Keflvíkingar komnir í bílstjórasætið

Keflvíkingar eru í lykilstöðu í einvígi sínu gegn liði Dungannon frá Norður-Írlandi eftir öruggan 4-1 sigur í fyrri leik liðanna sem fram fór á Keflavíkurvelli í gær. "Þetta einvígi er náttúrulega tveir leikir og það er ýmislegt sem getur gerst. Þeir misstu mann út af og þá gengum við á lagið. Ég er ánægður með að við skyldum hafa náð að vinna með þremur en mjög óánægður með að við fengum þetta mark á okkur," sagði Kristján Guðmundsson, þjálfari Keflavíkur.

Það tók Kelfvíkinga stundarfjórðung að ná að skora fyrsta markið en það gerði hinn færeysi Simun Samuelsen með hörkuskoti. Keflavík var betra liðið í fyrri hálfleiknum og hefði getað skorað fleiri mörk en Hólmar Örn Rúnarsson klúðraði dauðafæri undir lok hans. Gestirnir fengu reyndar sín færi og komust nálægt því að skora þegar Ómar Jóhannsson missti boltann undir sig og hann fór í stöngina.

Þá var komið að þætti Guðmundar Steinarssonar sem skoraði tvö næstu mörk, það síðara úr vítaspyrnu sem dæmd var eftir að brotið var á Baldri Sigurðssyni. Fljótlega eftir seinna markið fékk Rodney McAree að líta rauða spjaldið og Dungannon-menn voru manni færri í tæpar tuttugu mínútur. Magnús Sverrir Þorsteinsson kom Keflavík í 4-0 en Dungannon minnkaði muninn með stórglæsilegu marki beint úr aukaspyrnu undir lokin. Keflvíkingar geta þakkað fyrir að enginn leikmaður liðsins meiddist í þessum leik en leikmenn Dungannon voru óhræddir við að tækla í leiknum.

"Þeir vilja vera í návígi og tækla og við vissum það fyrir leikinn. Í hálfleik sagði ég síðan við mína menn að gæði sendingana þyrfti að batna og það tókst ágætlega," sagði Kristján. Seinni viðureign liðanna fer fram eftir viku ytra en ljóst að mikið þarf að fara úrskeiðis ef Keflavík á ekki að fara áfram í keppninni.