Fresturinn liðinn

Frestur sem mannræningar á Gaza-svæðinu hafa gefið bandarískum yfirvöldum til að láta palestínska fanga lausa, í skiptum fyrir tvo starfsmenn Fox fréttastöðvarinnar bandarísku, rann út í morgun.

Frétta- og myndatökumanni Fox var rænt í Gaza-borg 14. ágúst síðastliðinn en myndband af þeim var fyrst birt á miðvikudaginn. Áður óþekkt samtök herskárra Palestínumanna segjast hafa mennina í haldi.

Ekki hefur fengist gefið upp hvað mönnunum verði gert ef ekki verði gengið að kröfum samtakanna. Talsmaður innanríkisráðuneytis palestínsku heimastjórnar Palestínumann sagði í morgun að hann hefði heimildir fyrir því að mönnunum hefði ekki verið gert mein.