Hætt að sýna auglýsingar

Birtingar á auglýsingum frá Umferðarstofu hafa nú verið stöðvaðar tímabundið, eftir að Samkeppnisstofnun fór þess á leit við Umferðarstofu. Umboðsmaður barna skrifaði kvörtun til Samkeppnisstofnunar og bað hana um að kanna málið hvort 22.grein samkeppnislaga hefði verið brotin,en þar kemur meðal annars fram að auglýsingar skuli miðast við að börn sjái þær og heyri og ekki megi misbjóða þeim á neinn hátt.Þær skuli sýna sérstaka varkárni vegna trúgirni barna og unglinga og að þess sé gætt að ekki eru nein hættuleg atferli eða atvik sýnd, sem geta leitt til þess að þau eða önnur börn komist í hættu. Birgir Hákonarson hjá Umferðarstofu sagði þessar auglýsingarnar hafa þjónað sínum tilgangi, þær hefðu vakið sterk viðbrögð og fólk til umhugsunar, sem væri nauðsynlegt í umferðarmálum. "Við munum skila greinargerð til Samkeppnisstofnunar í dag, og jafnframt stöðva auglýsingarnar þar til hún kemst að niðurstöðu."