Lögmæti atkvæðagreiðslu athugað

Lögmenn álversins í Straumsvík kanna lögmæti hugsanlegrar atkvæðagreiðslu meðal bæjarbúa í Hafnarfirði um stækkun álversins. Upplýsingafulltrúi álversins segir að hálfum milljarði hafi verið varið í undirbúning stækkunarinnar og það sé vægast sagt sérkennilegt ætli bæjaryfirvöld að breyta leikreglunum eftir á. Lúðvík Geirsson bæjarstjóri í Hafnarfirði hefur sagt að ein af þeim hugmyndum sem bæjaryfirvöld séu að skoða sé að láta stækkun álversins í allsherjaratkvæðagreiðslu meðal bæjarbúa. Hrannar Pétursson, upplýsingafulltrúi Alcan á Íslandi, segir löggjafann ætla verkefnum af þessu tagi mjög skýran, lagalegan farveg. Þeim farvegi hafi Alcan fylgt í einu og öllu frá árinu 1999 þegar vinna við stækkunina hafi hafist. Fyrirtækinu finnist mjög óeðlilegt ef hægt sé að breyta leikreglum eftir á eins og einhverjar hugmyndir séu uppi um núna. Forsvarsmönnum Alcan þyki ástæða til að kanna hvort slík atkvæðagreisla standist lög. Þrjú ár eru síðan Skipulagsstofnun kvað upp úrskurð vegna mats á umhverfisáhrifum stækkunarinnar. Þá hefur bærinn selt álverinu umtalsvert land vegna hennar. Lúðvík Geirsson að næstu skref í málinu séu að fá viðbrögð við tillögu að deiliskipulagi þar sem gert er ráð fyrir stækkuninni. Menn geti komið að ábendingum næstu vikurnar auk þess sem gert sé ráð fyrir fundi með bæjarbúum.Framhaldið ráðist af viðbrögðum bæjarbúa. Það sé ekki tímabært að ræða viðbrögð Alcan frekar á þessu stigi. Aðspurður hvort Alcan líti svo á að bæjaryfirvöld í Hafnarfirði séu skuldbundin til þess að ráðast í verkefnið með fyrirtækinu segir Hrannar að forsvarsmenn þess líti svo á að allir málsaðilar, bæði félagið, bærinn eða almenningur sem hafi haft fleiri en eitt tækifæri til að gera athugasemdir í málinu, verði að fylgja þeim löglega farvegi sem málum sem þessum sé ætlað. Þá bætir hann við að Hafnarfjarðarbær hafi selt Alcan land undir stækkaða verksmiðju fyrir 300 milljónir króna, en hvort það bindi bæinn eitthvað gagnvart málinu láti hann ósagt. „Að minnsta kosti hefur hingað til ekki verið neitt annað en samhljómur um þetta verkefni í samskiptum okkar og bæjarins,“ segir Hrannar.