Lækkaði sektir olíufélaganna

Áfrýjunarnefnd samkeppnismála hefur lækkað sektir olíufélaganna vegna ólöglegs samráðs úr 2,6 milljörðum króna í um 1,5 milljarða, en það var samkeppnisráð krafði félögin um fyrrnefndu upphæðina. Þetta kemur fram í úrskurði nefndarinnar sem birtur var í dag. Vegna samstarfs við samkeppnisyfirvöld við að upplýsa málið er Olíufélaginu gert að greiða 490 milljónir í stað 605 milljóna og Skeljungur skal greiða 450 milljónir króna í stað 1,1 milljarðs. Þá segir í úrskurði áfrýjunarnefndar að Olíuverslun Íslands skuli greiða 560 milljónir króna í stað 880 milljóna í ákvörðun samkeppnisráðs. Félögin kærðu ákvörðun samkeppnisráðs á síðasta ári til áfrýjunarnefndar samkeppnismála og fluttu þau mál sitt fyrir nefndinni fyrr í þessum mánuði. Í úrskurði áfrýjunarnefndarinnar er m.a. staðfest sú niðurstaða samkeppnisráðs að olíufélögin hafi um níu ára skeið haft með sér skipulagt, umfangsmikið, samfellt ólögmætt samráð. Þá er ekki tekið undir þau sjónarmið olíufélaganna að brot félaganna á samkeppnislögum hafi verið fyrnd eða að málsmeðferð og rannsókn málsins hafi verið svo ábótavant að ógilda bæri niðurstöðu samkeppnisráðs. Áfrýjunarnefndin staðfestir einnig í meginatriðum niðurstöður samkeppnisráðs um einstök alvarleg brot olíufélaganna á samkeppnislögum. Þrátt fyrir að áfrýjunarnefnd samkeppnismála staðfesti þá niðurstöðu samkeppnisráðs að ávinningur olíufélaganna í formi svokallaðrar einingaframlegðar á fljótandi eldsneyti hafi hækkað á tímabilinu 1996-2001 í samanburði við árin 1993-1995 um 6,5 milljarða króna telur nefndin ástæðu til að lækka þær sektir sem samkeppnisráð hafði ákvarðað olíufélögunum.