Kveð með söknuði

Ég kveð auðvitað stjórnmálin með miklum söknuði því þau hafa verið líf mitt og yndi," sagði Davíð Oddsson á blaðamannafundi í gær að loknum þingflokks- og miðstjórnarfundi Sjálfstæðisflokksins í Valhöll. Þar kynnti Davíð þá ákvörðun sína að láta af formennsku í Sjálfstæðisflokknum og embætti utanríkis- og hagstofuráðherra. Halldór Ásgrímsson forsætisráðherra hefur nú þegar skipað Davíð formann bankastjórnar Seðlabankans og tekur hann við starfinu af Birgi Ísleifi Gunnarssyni 20. október næstkomandi. "Mér finnst ég vera of ungur til að hætta að fá viðnám fyrir mína krafta. Auðvitað vil ég trúa því eftir þá reynslu sem ég hef öðlast að ég geti komið að gagni í störfum þar. Það verður að koma í ljós," sagði Davíð. Geir H. Haarde, varaformaður Sjálfstæðisflokksins, hefur ákveðið að gefa kost á sér í formannskjöri Sjálfstæðisflokksins í næsta mánuði. "Ég held ég að mér sé óhætt að segja að augu manna hljóta að beinast að varaformanni flokksins, Geir H Haarde. Ætli það verði ekki mín seinustu pólitísku afskipti að kjósa hann," sagði Davíð. "Davíð Oddsson á mjög farsælan feril í stjórnmálum og er búinn að vera í forystu íslenskra stjórnmála um langan tíma. Samstarf okkar hefur verið farsælt. Við munum sakna hans. Ég skil ákvörðun hans og virði hana," segir Halldór Ásgrímsson forsætisráðherra. Árni Mathiesen sjávarútvegsráðherra tekur við embætti fjármálaráðherra og Einar K. Guðfinnsson þingflokksformaður tekur við embætti sjávarútvegsráðherra. Ráðherraskiptin verða á ríkisráðsfundi 27. september. Óráðið er hver tekur við þingflokksformennsku af Einari. Davíð Oddsson hefur verið formaður Sjálfstæðisflokksins í nær fimmtán ár og hefur aðeins Ólafur Thors setið lengur á formannstóli en hann. Davíð hefur haft afskipti af stjórnmálum í liðlega 30 ár. "Ég hef verið afar fyrirferðarmikill í þessu öllu saman, meira segja stundum svo að ýmsum hefur þótt nóg um," sagði Davíð.