Klukka gengur á fleiri en skákmenn

Að loknum sameiginlegum miðstjórnar- og þingflokksfundi Sjálfstæðisflokksins í gær tilkynnti Davíð Oddsson þá ákvörðun sína að bjóða sig ekki fram til áframhaldandi formennsku í Sjálfstæðisflokknum á landsfundi flokksins í næsta mánuði. Jafnframt lætur Davíð af embætti utanríkisráðherra á ríkisráðsfundi 27. september næstkomandi. Davíð segir að heilsufarsástæður ráði ekki ákvörðun sinni, en hann átti við veikindi að stríða og gekkst undir uppskurði á síðasta ári. "Maður fékk svona ákveðna áminningu um að klukkan tifar og hún gengur á fleiri en skákmenn. Allir þurfa að huga að því. Auðvitað var það svo að síðastliðið ár var ég ekki alveg á fleygiferð. Það fór tími í endurhæfingu og meðferðir. Þótt þær hafi ekki verið erfiðar né kvalafullar í sjálfu sér þá drógu þær úr afli og krafti meðan á því stóð. Ég tel mig vera kominn með afl á nýjan leik til að sinna nýju starfi. Það fer ekki hjá því þegar þú færð gult spjald að þá horfir þú á það og hagar þér aðeins betur til að fá ekki rautt." Forsætisráðherra skipaði í gær Davíð í embætti seðlabankastjóra til næstu sjö ára. Hann verður formaður bankastjórnarinnar og tekur við starfinu 20. október af Birgi Ísleifi Gunnarssyni, en hann lætur af störfum um næstu mánaðamót. Samráðherrar Davíðs segja fulla sátt um tillögur hans um breytta skipan ráðherra í ríkisstjórninni af hálfu Sjálfstæðisflokksins. Á ríkisráðsfundinum í lok mánaðarins tekur Geir H. Haarde við embætti utanríkisráðherra, Árni Mathiesen tekur við embætti fjármálaráðherra af Geir og Einar K. Guðfinnsson verður sjávarútvegsráðherra. "Það er mikil eftirsjá af Davíð þegar hann hverfur út úr stjórnmálunum. Við taka nýir tímar og ég hef ákveðið að gefa kost á mér til formennsku í flokknum," segir Geir. Aðspurður á blaðamannafundi í gær kvað Davíð Oddsson sjónir manna beinast að Geir H. Haarde sem eftirmanni á formannsstóli í Sjálfstæðisflokknum. "Ætli það verði ekki mín seinustu pólitísku afskipti að kjósa hann," sagði Davíð og vísaði þar til landsfundarins í næsta mánuði.