Dramatík í Landsbankadeildinni

Það gekk á ýmsu í síðari hálfleik í leikjunum fimm í Landsbankadeildinni nú áðan og fjöldi marka leit dagsins ljós á lokamínútunum. Mesta fjörið var á Laugardalsvelli, þar sem Grindvíkingar sóttu Þróttara heim og þurftu á sigri að halda. Ekkert mark var skorað í fyrri hálfleiknum í Laugardalnum, en í þeim síðari opnaðist fyrir allar flóðgáttir og mörkin streymdu inn. Halldór Arnar Hilmisson kom heimamönnum yfir á 55. mínútu, en Paul McShane jafnaði metin fyrir Grindvíkinga á þeirri 76. Páll Einarsson kom Þrótti aftur yfir á 82. mínútu, en gestirnir náðu að jafna með mikilli seiglu á 90. mínútu. Það var svo Ingvi Sveinsson sem setti stórt strik í reikninginn fyrir Grindvíkinga í fallslagnum þegar hann skoraði sigurmark Þróttara, nokrum andartökum fyrir lok leiksins. Íslandsmeistarar FH máttu sætta sig við tap á heimavelli fyrir Fylkismönnum. Það var Atli Viðar Björnsson sem kom FH yfir í fyrri hálfleik, en Peter Tranberg jafnaði fyrir Fylkir eftir klukkutíma leik. Það var svo Peter Tranberg sem skemmdi nokkuð fyrir hátíðarhöldum heimamanna með því að skora sigurmark Fylkis, mínútu fyrir leikslok. FHingar gátu þó huggað sig við að taka á móti bikarnum í leikslok, enda löngu orðnir meistarar. KRingar hlutu uppreisn æru gegn erkifjendum sínum í Val og unnu góðan 2-0 sigur, þar sem Grétar Ólafur Hjartarson skoraði bæði mörk heimamanna sem réðu nýjan þjálfara í morgun. ÍBV er ekki sloppið við falldrauginn eftir 0-2 tap á heimavelli fyrir sterkum Skagamönnum. Það voru þeir Sigurður Ragnar Eyjólfsson og Andri Júlíusson sem gerðu mörk ÍA í síðari hálfleiknum. Keflvíkingar unnu svo góðan sigur á Fram í Keflavík. Hörður Sveinsson kom heimamönnum yfir á 7. mínútu og Guðmundur Steinarsson bætti við öðru marki eftir rúman hálftíma. Andri Fannar Ottósson minnkaði muninn fyrir Safamýrarpilta aðeins mínútu síðar, en þar við sat.