Birgir Leifur á sex undir pari

Íslandsmeistarinn í golfi, Birgir Leifur Hafþórsson, lék í morgun á þremur höggum undir pari á opna Texbond-mótinu sem fram fer við Gardavatn á Ítalíu. Hann er því samtals á sex höggum undir pari eftir þrjá keppnisdaga. Birgir Leifur fékk tvo erni, þrjá fugla, tvo skolla, einn tvöfaldan skolla og paraði tíu holur í morgun. Birgir Leifur er í 21. sæti ásamt níu öðrum kylfingum. Enn eiga margir kylfingar eftir að ljúka leik. Norður-Írinn Michael Hoey hafði forystu rétt fyrir hádegi, var á 15 höggum undir pari eftir tólf holur.