Gæslan hafi ekki beðið álitshnekki

Dómsmálaráðherra sér ekki að Landhelgisgæslan, sem fer með löggæsluhlutverk á hafsvæðinu í kringum Ísland, hafi beðið álitshnekki þótt áhöld séu um hvort hún fari með skipaolíu og standi skil á opinberum gjöldum eins og lög kveða á um. Í hátt á þriðja ár hefur Landhelgisgæslan keypt skipagasolíu í Færeyjum. Í fréttum Stöðvar 2 í gær var birt viðtal við Georg Lárusson, forstjóra Landhelgisgæslunnar, þar sem hann sagði að olíunni væri oft og tíðum dælt á varðskipið Óðinn sem liggur við Reykjavíkurhöfn. Landhelgisgæslan þarf ekki að greiða virðisaukaskatt af olíu sem keypt er í Færeyjum en þyrfti að gera það væri hún keypt hér á landi. Landhelgisgæslan er samningsbundin Skeljungi þegar keypt er eldsneyti hér á landi, samkvæmt samningi sem gerður var á síðasta ári. Samkvæmt listaverði á skipagasolíu hjá Shell í Færeyjum á fimmtudag var verð Skeljungs nokkrum aurum lægra og var reyndar svipað í löndunum allt síðasta ár. Þær tölur segja þó ekki allt því fyrirtækin geta gefið viðskiptavinum sínum afslátt. Að sögn forsvarsmanna Skeljungs er það verð sem Skeljungur býður Landhelgisgæslunni vel samkeppnishæft. Skeljungur eigi hins vegar erfitt með að keppa við færeysk olíufyrirtæki því virðisaukaskattur sé lagður á verðið hér en ekki í Færeyjum. Þá eru áhöld um að gæslan greiði ekki lögbundið flutningsjöfnunargjald af olíunni, sem tollstjóri segir að greiða skuli ef henni er dælt milli skipa. Þá hafði hafnarstjóri ekki hugmynd um að það tíðkaðist að dæla olíu milli varðskipa við höfnina í Reykjavík. Aldrei hefur verið sótt um leyfi til slíks. Aðspurður hvort það geti það talist eðlileg sparnaðarleið hjá opinberu fyrirtæki að greiða ekki skatt hér og kaupa skattfrjálst af fyrirtæki í útlöndum, svaraði Björn Bjarnason dómsmálaráðherra þessu til í gegnum tölvupóst, enda staddur úti á landi. „Ef Landhelgisgæslan fer ekki að reglum Reykjavíkurhafnar eða skattalögum ber að sjálfsögðu að bæta úr því. Stjórnendur Landhelgisgæslunnar hafa á hinn bóginn að sjálfsögðu heimild til að nýta sér tækifæri til hagkvæmni í rekstri en verða auðvitað að fara að lögum.“ Aðspurður hvort önnur opinber fyrirtæki eins og t.d. Hafrannsóknarstofnunin geti tekið upp svipaða hætti í sparnaðarskyni, segir ráðherra: „Ég ætla ekki að svara neinu um skip Hafrannsóknarstofnunar, en að sjálfsögðu hljóta stjórnendur þeirra að huga að hagkvæmni í rekstri eins og aðrir.“ Og aðspurður hvort það skaði trúverðugleika Landhelgisgæslunnar, sem gegnir löggæsluhlutverki, ef áhöld eru um hvort hún fylgi settum lögum og reglum, segir dómsmálaráðherra: „Þetta er ekki í fyrsta sinn, sem um þessi mál er rætt, og sé ég ekki að Landhelgisgæslan hafi orðið fyrir neinum álitshnekki vegna þeirra. Hitt er eðlilegt, að olíufyrirtæki á Íslandi og málsvarar þeirra hallamæli gæslunni og öðrum, sem kjósa að kaupa vörur af öðrum en þeim.“