SFR og ríkið gera nýjan samning

SFR, stéttarfélag í almannaþjónustu, samdi í morgun við fjármálaráðuneytið um nýjan kjarasamning eftir næturlangan fund. Hann mun gilda frá 1. febrúar síðastliðnum til 30. apríl 2008 og nema launahækkanir á samningstímanum samtals um átján prósentum. Þá er ákvæði í samningnum um tuttugu þúsund króna eingreiðslu til þeirra félagsmanna SFR sem voru í fullu starfi í desember og janúar. Auk þess hækkar orlofsuppbót og tekin verður upp ný rammalaus launatafla frá 1. maí á næsta ári, eftir því sem fram kemur í frétt á heimasíðu SFR. Haft er eftir Jens Andréssyni, formanni SFR, að hann sé bærilega sáttur við samninginn og telur Jens að hann muni tryggja félagsmönnum áframhaldandi kaupmáttaraukningu.