Háskólanám kynnt í Borgarleikhúsi

Stóri háskóladagurinn er í dag. Námsframboð sjö háskóla er kynnt í Borgarleikhúsinu til klukkan fimm og segir Guðjón Helgason, kynningarstjóri Kennaraháskóla Íslands, að fjölmenni hafi verið þegar við opnun klukkan ellefu í morgun. Vegna auglýsingaherferðar upp á síðkastið þar sem námsmenn eru hvattir til að velta því fyrir sér hvort þeir séu á réttri hillu liggur beint við að spyrja hvort svo sé. Guðjón segir að það sem lagt sé upp með í auglýsingaherferðinni sé að þeir nemendur sem hyggi á háskólanám velti því vandlega fyrir sér hvað þeir hafi áhuga á að skoða. Verið sé að leggja áherslu á að þetta sé mikilvæg ákvörðun og nauðsynlegt sé að vanda valið og þess vegna hvetji hann nemendur til þess að koma í Borgarleikhúsið og skoða allt sem sé í boði. Guðjón segir að flutt verði erindi þar sem kynntur verði hluti af því sem í boði er í hverjum skóla. Leitað verði svara við spurningum eins og af hverju það sé skemmtilegt að vera iðjuþjálfi eða íþróttakennari og fjallað verði um áhugamál sem geti orðið að atvinnutækifærum. Guðjón segir enn fremur að Listaháskólinn standi fyrir viðburðum á kynningunni og kynni það sem skólinn hafi upp á að bjóða með listsköpun. Háskólarnir sem eru með fulltrúa á svæðinu eru Háskólinn á Akureyri, Háskólinn í Reykjavík sem hefur sameinast Tækniháskólanum, Hólaskóli, háskólinn að Hólum í Hjaltadal, Kennaraháskóli Íslands, Landbúnaðarháskóli Íslands, Listaháskóli Íslands og Viðskiptaháskólinn á Bifröst.