Bandaríkjamenn skutu á bíl Sgrena

Ítalska blaðakonan Giuliana Sgrena sem sleppt var úr haldi mannræningja í Írak í dag, særðist lítillega þegar bandarískir hermenn skutu á bílinn sem átti að flytja hana á flugvöllinn í Bagdad. Að sögn AP fréttastofunnar lést starfsmaður ítölsku leyniþjónustunnar sem var í bílnum með Sgrena. Silvio Berlusconi forsætisráðherra Ítalíu kallaði í kvöld sendiherra Bandaríkjanna á sinn fund og krafðist skýringa á árásinni sem hann sagði grafalvarlega. Bandaríski herinn í Bagdad staðfesti í kvöld að bandarískir hermenn hefðu skotið á bílinn sem Sgrena og túlkur hennar voru í og sagði talsmaður hersins að rannsókn væri hafin á atvikinu. Skotið var á bíl Sgrena um klukkan 18 að íslenskum tíma og sagði talsmaður Bandaríkjahers að hermönnum hefði þótt bíllinn grunsamlegur. Ökumaðurinn hefði ekið greitt í átt til þeirra og ekki sinnt merkjum um að stöðva og því hefðu þeir skotið á bílinn. túlkurinn Calipari er talinn hafa látist samstundis en hann reyndi að skýla Sgrena fyrir skotum Bandarískra hermanna. Sgrena slasaðist á öxl og er nú á hersjúkrahúsi í Bagdad. Silvio Berlusconi, forsætisráðherra Ítalíu, sagðist í kvöld vilja skýringar á þessu atviki og jafnframt að einhver yrði að axla ábygð á því. Berlusconi sagðist hafa fagnað fréttum af lausn Sgrena úr haldi mannræningja en gleðin hefði nú snúist upp í harmleik.