Neysla ofvirknilyfja sexfaldast

Neysla Íslendinga á ofvirknilyfjum hefur sexfaldast á síðustu fimm árum. Þetta kemur fram í nýrri ársskýrslu lyfjaeftirlits Sameinuðu þjóðanna. Ársskýrsla Lyfjaeftirlitsins var kynnt í dag. Þar segir að neysla ofvirknilyfja á Íslandi hafi aukist um 500 prósent á síðustu fimm árum og að hvergi í heiminum sé slíkra lyfja neytt í meiri mæli. Í skýrslunni segir að neysla þessara lyfja hafi aukist svipað í Noregi, Sviss og Bretlandi. Matthías Halldórsson aðstoðarlandlæknir segir enga einfalda skýringu vera á þessari aukningu. Ein skýringin geti verið að lyfjaformið hafi breyst. Áður var notað skammtvirkt rítalín sem krakkar þurftu þá gjarnan að taka þrisvar á dag. Núna eru komin langvirk efni sem nóg er að taka einu sinni á dag sem er hentugra að sögn Matthíasar. Önnur möguleg skýring er að farið er að nota þessa lyfjameðferð í auknum mæli fyrir fullorðna sem ekki var gert fyrir nokkrum árum. Þriðja skýringin gæti verið að ekki sé eins líklegt og áður að lyfin séu misnotuð því fíkniefnaneytendur fá ekki jafnmikið út úr misnotkun á langvikru töflunum og rítalíninu þó virka innihaldsefnið sé það sama. Notkun ofvirknilyfja hefur breyst mikið á undanförnum árum og Íslendingar verið fljótir að tileinka sér nýjar útgáfur lyfjanna. Samt stendur eftir spurningin hvers vegna við hér á Íslandi notum meira af þessum lyfjum en aðrir. Matthías segir ekki gott að segja hvað valdi og bendir á Íslendingar séu almennt fljótir að tileinka sér nýjungar, hvort sem litið er til lyfja, hjartaþræðinga, farsímanotkunar, tölvunotkunar eða einhvers annars. Gott aðgengi að læknum hefur líklega eitthvað að segja í þessu sambandi að sögn Matthíasar.