Lægstu laun verða 200 þúsund

Frá og með 1. maí næstkomandi hækka lægstu laun aðildarfélaga Bandalags háskólamanna upp í 200 þúsund krónur, samkvæmt nýjum kjarasamningi sem gerður hefur verið við ríkið. 24 af 25 aðildarfélögum BHM sömdu við ríkið en Félag náttúrufræðinga taldi undirbúningstímann of skamman. Nýr kjarasamningur ríkisins og aðildarfélaga Bandalags háskólamanna var undirritaður í húsakynnum ríkissáttasemjara á tólfta tímanum í gærkvöldi. Samningurinn gildir frá 1. febrúar síðastliðnum til 30. apríl árið 2008. Félag náttúrufræðinga ákvað að vera ekki í samfloti við önnur aðildarfélög BHM þar sem það telur nauðsynlegt að fá lengri tíma til að undirbúa sinn samning. Áfangahækkanir sem samið var um eru þær sömu og samið hefur verið um á almennum vinnumarkaði en ríkið metur heildarkostnaðaraukninguna á 19,83 prósent. Halldóra Friðjónsdóttir, formaður BHM, segir að meginmarkmiðið hafi verið að hækka lægstu laun félagsmanna. Þeir treysti því að nú þegar ein launatafla og einn stofnanasamningur taki gildi fyrir alla gangi betur að útrýma þeim launamun kynjanna sem því miður hafi viðhaldist bæði hjá ríkinu og á almennum markaði. Aðspurð hversu mikið launin hækka segir Halldóra það misjafnt eftir einstaklingum og félögum. Það eigi að vera tryggt að hvert félag fái um 15 prósenta launahækkun með samningnum en fyrir einstaklinga geti það verið aðeins minna eða töluvert meira. Það fari eftir því hvar fólki sé raðað innan síns félags og hvernig félagið standi. Halldóra segir að frá og með 1. maí verði lægstu laun 200 þúsund í nýrri töflu og síðan eigi eftir að verða hækkanir í töflunni þannig að lágamarkslaun verði nálægt 210 þúsund krónum þegar samningstíma ljúki. Vel megi við una þótt auðvitað hafi hún viljað ná meira út út samningum.