Ráðherra líti sér nær

Áfengisheildsalar vísa á bug ásökunum fjármálaráðherra um að þeir lækki ekki verð á víni sem keypt er fyrir Bandaríkjadollara, í samræmi við lækkandi gengi dollarans. Geir H. Haarde fjármálaráðherra lýsti þessum skoðunum sínum á Morgunvakt Rásar tvö í gærmorgun og sagði að sig grunaði að heildsalar lækkuðu ekki vörur sem væru greiddar í dollurum. Aðspurður hvort hann gæti nefnt sérstaka vörutegund í þessum efnum nefndi Geir áfengi. Hann þekkti vel til þar og vissi að mikið af víni væri keypt í dollurum og hann væri ekki viss um að lágt gengi hefði skilað sér í kaupverð. "Heildsalarnir sem þar eiga hlut að verða að standa sig betur." "Ölgerðin flytur engar vörur inn fyrir Bandaríkjamynt, þetta er allt í evrum," segir Bjarni Brandsson, deildarstjóri í áfengisdeild Ölgerðarinnar. Bjarni segir að fyrir nokkrum árum, þegar dollarinn var sem hæstur, hafi flestir farið að greiða fyrir vörur í evrum og segir að þær vörur sem greiddar séu í dollurum séu aðeins örlítill hluti af vörulager ÁTVR. Ásgeir Johansen, framkvæmdastjóri Rolf Johansen & Company, segir að þar séu mjög fáar vörur greiddar í dollurum og einnig að innkaupsverð birgja sé sáralítill hluti af verði til ÁTVR. "Áfengisgjaldið er svo stór hluti að jafnvel þótt innkaupsverðið lækki endurspeglast það að litlu leyti í verðinu." Undir þetta tekur upplýsingafulltrúi Karls K. Karlssonar ehf. sem og Guðrún Björk Geirsdóttir, deildarstjóri í víndeild Austurbakka. "Innkaupsverð af einni léttvínsflösku er kannski dollari. Við það bætist alkóhólgjald sem er 450 krónur, í ÁTVR bætist við 13 prósenta álagning og svo virðisaukaskattur ofan á það. Neytandinn sér lítið af þeim verðbreytingum sem verða hjá okkur en við reynum að sjálfsögðu að láta þær skila sér," segir Guðrún. Guðrún bætir við að sér þyki gagnrýnin koma úr hörðustu átt, þar sem fjármálaráðherra hafi hækkað skatt á sterku víni í tvígang síðan 2002, sem birgjar hafi borið kostnað af. "Hvernig í ósköpunum eiga neytendur að verða varir við einhverja lækkun?"