Uppgreiðslurnar námu milljarði

Uppgreiðslur lána hjá Byggðastofnun námu tæpum 1.100 milljónum króna frá 1. september 2004 fram til dagsins í dag. Það er um 8-9 prósent af heildarútlánum. Uppgreiðslurnar hafa dregist umtalsvert saman upp á síðkastið en Aðalsteinn Þorsteinsson, forstjóri Byggðastofnunar, vill ekki nefna neina tölu. Segir starfsfólkið bara merkja það í sínum daglegu störfum. Uppgreiðslurnar voru sérstaklega miklar í september og október á síðasta ári en það tímabil var "mjög bratt" þegar bankarnir fóru inn á fasteignalánamarkaðinn og lækkuðu vexti. "Okkur fannst svolítið skrítið að það skyldi koma heilmikil skriða því að við erum ekki í íbúðalánunum en það segir okkur bara að það er eitthvað að smitast þarna á milli. Menn voru að nýta þá fjármuni í ýmsa hluti, það er alveg ljóst," segir Aðalsteinn. Fjármál Byggðastofnunar hafa talsvert verið til umræðu en Herdís Á. Sæmundardóttir, stjórnarformaður Byggðastofnunar, lagði fram þingsályktunartillögu um að ríkisstjórninni verði falið að veita stofnuninni einn milljarð króna. Aðalsteinn segir að ekki megi verða mikið framhald á uppgreiðslunum. "Ég vil meina að það hafi dregið verulega úr þessari þróun og ákveðið jafnvægi sé komið á. Ég myndi ekki vilja sjá uppgreiðslurnar verða mikið fleiri." Byggðastofnun hefur takmarkað svigrúm til að bregðast við þróuninni en lækkaði þó vexti 1. desember. Aðalsteinn segir að við það hafi heldur dregið úr þróuninni. Þá segir hann að verði breytingar á gengi krónunnar til lækkunar síðar á árinu eins og sumar greiningardeildir bankanna gera ráð fyrir þá geti það haft breytingar í för með sér. Vextir á langtímalánum og framkvæmdalánum eigi tæplega eftir að hækka aftur. "Þessi staða leiðir til þess að við hér í Byggðastofnun þurfum að setjast niður og meta stöðuna," segir hann. "Menn þurfa að velta fyrir sér hver er tilgangurinn með starfseminni og í hvaða búningi hún þarf að vera til að geta starfað."