Auðveldar mannahald

Nokkuð er um að fiskvinnslufyrirtæki eigi húsnæði, jafnvel heilt fjölbýlishús, til að geta leigt út til erlendra farandverkamanna á höfuðborgarsvæðinu og er þar auðvitað um nútíma verbúðir að ræða. Talsverður áhugi virðist vera á þessu fyrirkomulagi hjá fyrirtækjunum enda verður þannig auðveldara að fá starfsfólk og atvinnuleyfi fyrir það. Fiskkaup í Reykjavík, sem er í eigu Jóns Ásbjörnssonar, á fjölbýlishúsið númer 29 við Nýlendugötu í Reykjavík. Ásbjörn Jónsson framkvæmdastjóri segir að afi sinn hafi byggt húsið árið 1936 og það hafi verið í eigu fjölskyldunnar alla tíð síðan. Í húsinu séu fimm litlar íbúðir og þær séu leigðar erlendu farandverkafólki á góðum kjörum en hjá Fiskkaupum starfa um 20 verkamenn. Óskar Þór Karlsson, formaður Samtaka fiskvinnslu án útgerðar, rekur Ísfisk ehf. Fyrirtæki hans á fimm herbergja íbúð sem fjórir til fimm verkamenn geta búið í meðan þeir finna eigin húsnæði. Þá hefur Toppfiskur í Hafnarfirði leitað að húsnæði til kaups í mörg ár.