TM sendir frá sér afkomuviðvörun

Tryggingamiðstöðin hefur líkt og Samherji gefið út afkomuviðvörun í tengslum við stórbrunann sem varð í fiskimjölsverksmiðju Samherja í Grindavík í gær. Eignirnar voru tryggðar hjá Tryggingamiðstöðinni sem gerir ráð fyrir að áhrif þess á afkomu félagsins muni nema tvö hundruð milljónum króna að viðbættum viðbótariðgjöldum sem greiða þarf til endurtryggjenda þegar svona stórt tjón verður. Samherji gerir ráð fyrir að brunatjónið muni hafa neikvæð áhrif á reksturinn á fyrsta ársfjórðungi, allar uppsjávarveiðar og hrognavinnslu en að unnið sé að því að draga úr áhrifunum með því að tryggja hrognavinnsluna í Grindavík. Þessa stundina er verið að meta tjónið en strax í morgun varð ljóst að hluti tækja hafði sloppið við skemmdir. Fram undan er annasamasti tími ársins hjá verksmiðjunni þannig að eldurinn gat ekki komið upp á verri tíma. Rannsókn er hafin á upptökum eldsins en talið að sjálfsíkveikja hafi orðið í mjöli sem var í þurrkun.