Verða af töluverðum tekjum

Stór hluti árstekna þeirra starfsmanna sem vinna í fiskimjölsverksmiðju Samherja í Grindavík verður til á loðnuvertíðinni sem stendur nú sem hæst. Bæjarstjórinn segir brunann í gær mikið áfall fyrir bæjarfélagið sem verði af töluverðum tekjum. Hann hefur þó trú á að verksmiðjan verði byggð upp að nýju þar sem hluti af tækjum skemmdist ekki. „Við erum að byrja að ná áttum," segir Óskar Ævarsson verksmiðjustjóri sem í morgun fundaði með starfsmönnum Fiskimjöls og lýsis, verksmiðju Samherja í Grindavík. Mikið tjón varð þar af völdum elds í gær, en talið er að sjálfsíkveikja hafi orðið í mjöli sem verið var að þurrka. Rannsókn á upptökum eldsins hófst í birtingu. Verksmiðjan hefur verið endurnýjuð með miklum tilkostnaði undanfarin ár og sluppu allar nýbyggingarnar að sögn Óskars. Eldurinn takmarkaðist við eitt brunahólf þar sem hluti af framleiðslutækjunum var. Ljóst er að ekki verður um frekari loðnubræðslu þennan veturinn. Segja má að bruninn hafi komið á versta mögulega tíma því fram undan er annamesti tími ársins hjá verksmiðjunni. Loðnan er farin að ganga vestur með suðurströndinni þannig að hagkvæmt er fyrir skipin að landa í Grindavík til bræðslu. Óskar segir að eitthvað af loðnunni sem veiðist á svæðinu verði brætt í bræðslunni í Helguvík og það geti verið að einhverjir starfsmenn verksmiðjunnar í Grindavík fái starf þar. Fimmtán starfsmenn eru í föstu starfi hjá Fiskimjöli og lýsi í Grindavík og fimm með tímabundna ráðningu vegna vertíðarinnar. Engin ákvörðun hefur verið tekin um framhaldið, það er að segja hvort byggt verði upp að nýju á sama stað en þessi mál verða öll skoðuð vel í dag og næstu daga. Árni Mathiesen sjávarútvegsráðherra fundaði með eigendum Samherja í Grindavík í morgun og það sama ætlar bæjarstjórinn Ólafur Örn Ólafsson að gera síðar í dag. Bæjarstjórinn segir áfallið mikið því þarna starfi um 15-20 manns og fyritækinu fylgi miklar tekjur fyrir hafnarsjóð. Skaðinn sé því mikill fyrir bæði eigendur og Grindvíkinga. Aðspurður hvort hann telji að verksmiðjan verði byggð upp aftur segir Ólafur að hann hafi kannað aðstæður í morgun og þá hafi verksmiðjustjórinn tjáð honum að tæki væru ekki eins illa farin og útlit hefði verið fyrir í gærkvöld. Hann bindi því vonir við að byggt verði aftur upp og fyrirtækið verði klárt fyrir næstu vertíð. Ólafur segir atvinnuástand þó almennt gott í bænum, sjávarútveginn hafa gengið vel og atvinnuleysi lítið. 1250 tonnum af mjöli sem búið var að þurrka áður en eldurinn kom upp verður skipað út í dag og sent til Frakklands og þá urðu lýsistankar ekki fyrir neinum skemmdum að sögn verksmiðjustjórans. Fiskimjölsverksmiðjan var tryggð hjá Tryggingamiðstöðinni og eru verið að leggja mat á tjónið þessa stundina. Forstjóri tryggingafélagsins vildi ekki gefa upp tryggingarfjárhæðina í samtali við fréttastofu en í Morgunblaðinu í morgun segir að hún sé 1,8 milljarðar króna. Það er ekki alveg rétt segir forstjórinn. Hvað sem tryggingum líður mun bruninn koma til með að hafa neikvæð áhrif á rekstur Samherja, allar uppsjávarveiðar og hrognavinnslu og þar með reksturinn á fyrsta ársfjórðungi. Í tilkynningu frá forsvarsmönnum félagsins segir að ekki sé hægt að segja til um það á þessari stundu hversu mikil áhrifin verði en unnið sé að því að draga úr þeim með því að tryggja hrognavinnslu félagsins í Grindavík.