100 milljónir á ári í rannsóknir

Háskólasjóður Eimskipafélagsins mun árlega geta lagt Háskóla Íslands til 100 milljónir króna sem nýta á til að efla rannsóknartengt framhaldsnám meistara- og doktorsnema. Verðmæti sjóðsins er nú um 2,2 milljarðar króna. Björgólfur Thor Björgólfsson, stjórnarformaður Burðaráss, og Páll Skúlason Háskólarektor undirrituðu viljayfirlýsingu um breytingar á hlutverki sjóðsins. Sjóðurinn mun leggja hálfan milljarð til byggingar háskólatorgs og stuðla með því að lausn á bráðum húsnæðisvanda Háskóla Íslands. Háskólasjóður Eimskipafélagsins var stofnaður 1964 til minningar um Vestur-Íslendinga sem áttu þátt í stofnun skipafélagsins. Sjóðurinn hefur til þessa allur verið varðveittur í bréfum í Eimskipafélaginu en mun nú fá heimild til að minnka hlut sinn í félaginu og er markmiðið að sjóðnum verði stýrt með tilliti til eðlilegrar áhættudreifingar slíkra sjóða. Stjórn Eimskipafélagsins á hverjum tíma réð atkvæðisrétti eignar sjóðsins. Páll Skúlason segir breytingar á starfsemi sjóðsins stórt skref í þá átt að efla Háskóla Íslands sem rannsóknarháskóla.