Ekki bræðsla í verksmiðju Samherja

Gríðarlegt tjón varð þegar eldur kom upp í fiskimjölsverksmiðju Samherja í Grindavík nú síðdegis. Nokkuð ljóst er að engin bræðsla verður starfrækt í Grindavík á komandi vertíð. Mikill eldur braust út í verksmiðjunni eftir sprengingu í þurrkara um klukkan hálffjögur í dag. Guðmundur Ólafsson varð vitni að henni og segir að rétt fyrir hálffjögur hafi hann heyrt mikinn hvell og tíu mínútum seinna hafi allt skíðlogað. Hann hafi verið inni á skrifstofu og fljótlega eftir hvellinn hafi allt horfið í gufumekki. Loftur Ólafsson, starfsmaður í verksmiðjunni, segir að um átta manns hafi verið að vinna í henni þegar eldurinn braust út en að en hann telur að enginn hafi verið í hættu. Ásmundur Jónsson, slökkviliðsstjóri í Grindavík, segir að þakið á verksmiðjunni hafi að mestu verið farið af þegar slökkvilið hafi komið á vettvang og honum sýnist sem öll verksmiðjan sé ónýt. Aðspurður hvernig gengið hafi að fást við eldinn segir Ásmundur að baráttan hafi verið mjög erfið. Reynt hafi verið að verja skrifstofubygginguna og mjölskemmu en slökkviliðið hafi fyrst varið gufukatla og sýrur til þess að missa það ekki. Það hafi verið töluverð vinna. Þorsteinn Már Baldvinnsson, forstjóri Samherja, segir að fyrirtækið hafi verið byggt upp á undanförnum árum og þeirri uppbyggingu hafi lokið síðastliðið sumar. Ljóst sé að ekki verði brædd loðna í verksmiðjunni í vetur. Aðspurður hvort rétt sé að það kosti 1,5 milljarða að byggja upp sams konar verksmiðju segir Þorsteinn ekki vita það. Þegar svona hlutir gerist sé byrjað á því að athuga hvort nokkur hafi slasast. Sem betur fer séu allir heilir en seinna verði spáð í eignatjón.