Bæjarútgerðin í Hafnarfirði rifin

Það stendur bókstaflega varla steinn yfir steini í gömlu bæjarútgerð Hafnarfjarðar. Hús félagsins eru að hverfa af yfirborði jarðar og áður en langt um líður verða risin þar fjölbýlishús. Nokkkuð er síðan að rekstri bæjarútgerðarinnar var hætt og var Kvikmyndasafn Íslands þar til húsa. Vika er frá því að hafist var handa við að rífa byggingar bæjarútgerðarinnar gömlu og hefur verkið gengið hratt og vel. Á morgun verður síðan farið í að rífa stóra húsið sem eftir stendur. Þeir höfðu orð á því mennirnir sem sjá um niðurrifið að járnabindingin sé mikil í húsinu og augljóst að þar hafi verið byggt hús sem átti að standa lengi og vel og líklega hægt að segja að svo hafi verið. Þeir hafa hins vegar ekki mikinn vinnufrið því þrátt fyrir að Vesturgatan, sem liggur með fram húsunum, sé lokuð og merkingar þar að lútandi hafi verið settar upp virðist sem ökumenn taki ekki nokkurt tillit til þess því stöðugur bílastraumur var undir bómu höggborsins á meðan hann var að mölva veggina. Í stað bæjarútgerðarinnar munu rísa nokkur fjölbýlishús á Norðurbakkanum, nokkurs konar bryggjuhverfi. Gert er ráð fyrir að framkvæmdir hefjist strax í sumar en þar sem um viðkvæmt svæði er að ræða er lögð áhersla á að framkvæmdir gangi hratt fyrir sig og er nú stefnt að því að hverfið verði risið árið 2006 eða 2007.