Elsta húsið fær andlitslyftingu

"Þetta samkomulag þýðir að Minjavernd tekur Aðalstræti 10 í sína vörslu næstu 35 árin og mun færa húsið í sitt upprunalega horf næstu mánuði," segir Steinunn Valdís Óskarsdóttir, borgarstjóri. Reykjavíkurborg hefur gert samning við Minjavernd um að lagfæra Aðalstræti 10 en það hús er það elsta í borginni. Húsið á sér afar merkilega sögu en hefur undanfarin ár hýst knæpur og bari og er afar illa farið að innan af þeim sökum. Steinunn segir að samningur borgarinnar og Minjaverndar kveði á um að húsið verði lagfært og fært í sitt gamla form á næstu tveimur árum en hjá Minjavernd áætla menn að slíkt geti kostað allt að 40 milljónum króna. Steinunn segir verkefnið brýnt enda sé húsið í mikilli niðurníðslu og ekki seinna vænna að hefja uppbyggingarstarfið. "Þetta er síðasta húsið í Aðalstræti sem ekki hefur verið gert upp og mun breyta og bæta ásýnd götunnar og miðbæjarins mikið þegar þeim framkvæmdum verður lokið."