Bögglaði fólksbíl undir sig

Minnstu munaði að verr færi þegar skólabíll rann í fljúgandi hálku niður Eskihvamminn í Kópavogi í morgun, hafnaði á fólksbíl á mótum Fífuhvammsvegar og bögglaði fólksbílinn nánast undir sig. Svo vel vildi til að ökumaður fólksbílsins var nýfarinn út úr honum þar sem hann komst ekkert vegna hálku og slapp hann því frá árekstrinum. Sömuleiðis sluppu tveir krakkar í skólabílnum og ökumaður hans ómeiddir. Þrír sjúkrabílar og tækjabíll slökkviliðsins voru sendir á vettvang því óttast var að þarna hefði orðið stórslys. Stórvirkar vinnuvélar þurfti til að greiða úr flækjunni. Að sögn lögreglunnar í Kópavogi var skólabíllinn á nýjum góðum nagladekkjum en skyndileg hálkan varð svo mikil að ökumaður réð ekki við bílinn.