Aðalfundur Freyju ógiltur

Laganefnd Framsóknarflokksins hefur úrskurðað að aðalfundur Freyju, félags framsóknarkvenna í Kópavogi, sem fór fram 27. janúar síðastliðinn sé ógiltur og sömuleiðis allar afgreiðslur fundarins, þar með taldar kosningar til trúnaðarstarfa. Gamla stjórnin skal boða til nýs aðalfundar svo fljótt sem auðið er og skulu inntökubeiðnir afgreiddar í upphafi aðalfundar. Laganefndin fjallaði ekki um ágreiningsefni að öðru leyti. Una María Óskarsdóttir, varaformaður Freyju, segir að Freyjurnar séu ánægðar með úrskurðinn því hann sýni að tekist hafi að afstýra valdaráni. "Í því fólust bein, opinber afskipti frá þingmanni úr öðru kjördæmi af flokksstarfi Freyjukvenna í Kópavogi. Slík afskipti hafa ekki viðgengist í okkar flokki og margir telja það alvarlegt mál og í rauninni siðlaust," segir hún. Una María telur þá niðurstöðu ekki koma málinu við að ekki hafi verið löglega að aðalfundi staðið. Meginniðurstaðan sé sú að tekist hafi að afstýra valdaráni. Laganefnd taki ekki afstöðu til annarra atriða enda líklegt að sú niðurstaða hefði orðið stjórninni í vil. Aðalheiður Sigursveinsdóttir, mágkona Árna Magnússonar félagsmálaráðherra, lætur á sér skilja að hún sé sátt við niðurstöðuna en segir hana óvenjulega, kærandinn sé kærður og á þar við að formaðurinn hafi sent kæruna til laganefndar. "Niðurstaðan er skýr. Laganefndin leggur ekki dóm á okkar starfshætti eða aðkomu að fundinum. Mér finnst það mjög jákvætt. Við hefðum auðvitað viljað að fundurinn væri löglegur og í því liggja viss vonbrigði," sagði hún. Aðalheiður bjóst við að reynt yrði að "ná lendingu" í þessu máli sem fyrst. Stjórnin kemur saman á næstunni og verður í framhaldi af því boðað til aðalfundar. Flokksþing Framsóknarflokksins verður 25. til 26. febrúar.