Lyf eru aðeins skammtímalausn

Lyf eru aðeins skammtímalausn í meðferð geðraskana hjá börnum og ráðast ekki að rótum vandans þó þau slái á einkennin, segir danskur sérfræðingur sem staddur er hér á landi. Sagt var frá því í fréttum Stöðvar 2 í gær að tíunda hvert fimm ára barn er með geðröskun samkvæmt nýrri íslenskri rannsókn sem greint var frá á ráðstefnu um geðraskanir barna. Þetta heldur hærra hlutfall en í nágrannalöndunum. Um leið nota íslensk börn geðlyf í mun meira mæli en jafnaldrar þeirra annars staðar á Norðurlöndum. Poul Nielsen sálfræðingur, sem flutti erindi á ráðstefnunni, segir að lyf séu ekki lausnin. Þau hafi þau áhrif þegar best lætur að einkenni geðraskana hverfi en þau breyti ekki persónuleika fólks eða starfsemi hans. Lyfin taki burt einkennin en meðhöndli þau ekki. Þá segir Nielsen að lyfjameðferðir miðist við hvern einstakling fyrir sig í stað þess að tengslum milli einstaklinga sé breytt. Það sé sama hversu ruglaður maður sé, maður þurfi ætíð að læra að vera einn af hópnum. Nielsen mælir því með að Íslendingar leggi áherslu á annars konar meðferðir en menn viti ekki nógu vel hvaða meðferð virki best og mun markvissari rannsóknir þurfi. Ef um sé að ræða alvarleg mál sé ekki nóg að skoða tengslin eða hvernig einstaklingar tengjast. Oft séu hömlur í tengslunum og hjá einstaklingum varðandi jákvæða þróun.