Einblínt um of á álverið

Tryggvi Harðarson, bæjarstjóri á Seyðisfirði, telur að það komi niður á Austurlandi ef stjórnvöld einblína um of á álversuppbygginguna fyrir austan. Öðrum atvinnugreinum þurfi að sinna líka. "Mér finnst viðhorfið einkennast af því að það sé nóg að vera með álver og ekki þurfi að gera neitt annað," segir hann. Seyðfirðingar njóta ekki framkvæmdanna vegna álversins á Reyðarfirði nema að takmörkuðu leyti en nokkrir einstaklingar hafa atvinnu í tengslum við uppbygginguna. Að öðru leyti finna Seyðfirðingar ekki fyrir þessum framkvæmdum. Nóg er að gera á Seyðisfirði, gróska í útgerð og ferðaþjónustu en 3.000 erlendir ferðamenn fara í gegnum Seyðisfjörð á sumrin. Bærinn hefur byggt upp bílastæði og aðstöðu fyrir ferðamennina fyrir 30 milljónir króna en þarf að gera betur. "Farþegarnir stoppa hér stutt en keyra um allt landið. Mér finnst lágmark að ríkið komi með annað eins til að gera þokkalegt húsbílastæði og ganga frá tjaldstæði," segir hann.