Ríkið blæs út

Fjölmörg dæmi eru um aukin umsvif ríkisstofnana, dæmi um rekstur sem hægt hefði verið að einkavæða. Flugmálastjórn keypti til dæmis nýlega fjarskiptastöðina í Gufunesi af Símanum og stofnaði fyrirtækið Flugfjarskipti sem er að fullu í eigu Flugmálastjórnar. Þvottahús Landspítala háskólasjúkrahúss rekur saumastofu sem útvegar spítalanum lín. Það leigir líka út lín til annarra aðila í stað þess að láta einkaaðila sjá um þvottinn. Vinnueftirlit ríkisins hefur gert starfsánægjukönnun fyrir Landspítala háskólasjúkrahús auk þess sem Ríkisendurskoðun hefur gert svipaðakonar könnun hjá starfsmönnum Landhelgisgæslunnar í stað þess að leita til einkafyrirtækis sem sérhæfa sig í gerð slíkra kannana. Landmælingar Íslands eiga að sinna ákveðinni grunnvinnu eins og viðhaldi og upplýsingagjöf en halda sig fjarri framkvæmdum og framleiðslu gagna í samkeppni við einkafyrirtæki. Í stað þess að hlúa að og styrkja einkafyrirtæki hafa Landmælingar verið í aukinni samkeppni við þau. Allt þetta telur Verslunarráð dæmi um rekstur sem er betur kominn hjá einkafyrirtækjum. Þór Sigfússon, framkvæmdastjóri Verslunarráðs, segir ástæðu til að hafa áhyggjur af vaxandi umsvifum einstakra ríkisstofnana. "Við höfum verið að fást við ótrúlega mörg fyrirtæki í eigu ríkisins sem eru í samkeppni við einkafyrirtæki. Auknar kröfur eru um að þessi fyrirtæki skapi sér sértekjur og þess vegna erum við í fleiri tilfellum að sjá ýmsar stofnanir keppa við einkafyrirtæki, til dæmis verkfræðistofur og ráðgjafafyrirtæki." Verslunarráð er að vinna tillögur um hvað eigi að gera við fyrirtæki af þessu tagi og vill frekar líta á þau sem sóknarfæri fyrir atvinnulífið.