Vilja vinna og selja eigin vörur

Vaxandi áhugi er meðal bænda á því að fá að vinna og selja sjálfir eigin landbúnaðarvörur. Landbúnaðarráðherra er þessa stundina að kynna hvernig norskir bændur hafa náð árangri á þessu sviði. Þegar um kjötafurðir er að ræða láta bændurnir slátra gripunum í viðurkenndum sláturhúsum en vinna svo úr skrokkunum heima og selja afurðir sínar beint, ekki síst til ferðamanna. Tilgangurinn á líka að vera að viðhalda vissum matar- og vinnsluvenjum og halda staðbundnum vinnsluvenjum, til dæmis við reykingu hangikjöts. Binda bændur vonir við aukin tengsl og tekjur af ferðamönnum og að í framíðinni geti þetta þróast út í það að fólk í þéttbýli kaupi af þeim afurðir í eins konar áskrift og myndi þannig tengsl við bæina. Vísir af því er þegar kominn í grænmetisviðskiptum. Ekki er ráðgert að bændur þurfi að ráðast í byggingu fullkominna kjötvinnslustöðva á hverjum bæ heldur séu matvælin meðhöndluð heima í góðum eldhúsum þeirra enda amist heilbrigðisyfirvöld ekki við því að morgunmatur til ferðamanna sé framreiddur úr eldhúsum bænda sem eru með bændagistingu. Norskir bændur hafa náð góðum árangri á þessu sviði og var skipuð sérstök nefnd til að kynna sér störf þeirra. Nefndin hefur nú skilað skýrslu um málið sem Guðni Ágústsson landbúnaðarráðhera er nú að kynna í veiðihúsinu við Lambhaga við Laxá í Leirársveit.