Dettifoss dreginn til Rotterdam

Stór, þýskur dráttarbátur er lagður af stað hingað til lands til að draga Dettifoss frá Eskifirði til Rotterdam þar sem hann verður tekinn í þurrkví til viðgerðar. Ekki er endanlega ákveðið hvort hannn mun draga Dettifoss með öllum farminum eða hluta hans, en hann er allur útflutningsvara. Varðskipin Týr og Ægir komu með Dettifoss í togi til Eskifjarðar um miðnætti eftir svaðilför út af Austfjörðum sem hófst með því að stýrið datt af Dettifossi á föstudagskvöldið og skipið varð stjórnlaust. Vel gekk að leggja þessu stærsta flutningaskipi íslenska flotans að bryggju enda var verður orðið gott. Kafarar munu kanna skemmdir á skipinu í dag en endanlegt umfang þeirra mun ekki sjást fyrr en skipið hefur verið tekið í þurrkví að sögn Höskuldar Ólafssonar, aðstoðarforstjóra Eimskips. Smíða þarf nýtt stýri og jafnvel sérsmíða eitthvað fleira þannig að skipið verður að minnsta kosti þrjár vikur frá siglingum. Nú er verið að brúa það bil, meðal annars með því að falast eftir leiguskipum á meðan viðgerð fer fram.