Brugðist við atviki á Hrafnistu

Sveinn Skúlason, forstjóri Hrafnistu, segir að þegar hafi verið brugðist við með úrbótum eftir að maður á níræðisaldri lést á vistheimilinu eftir höfuðhögg á síðasta ári. Landlæknisembættið telur í bráðabirgðaúrskurði að maðurinn hafi ekki fengið þá meðferð og umönnun sem ætlast er til af heilbrigðisstarfsfólki. Níu klukkutímar liðu frá því að maðurinn féll í gólfið í borðsal vistheimilisins þar til hann var fluttur á sjúkrahús. Sex dögum síðar lést hann án þess að hafa komið til meðvitundar. Lækninga- og hjúkrunarforstjórar Hrafnistu hafa sagt að mistök hafi átt sér stað, bæði við ákvarðanatöku og í vinnulagi starfsfólks og því er landlæknir sammála. Ekki var farið að reglum, eftirlit með manninum og skrásetning var ófullnægjandi og gerðar eru athugasemdir við að aðstandendur mannsins hefðu ekki verið látnir vita af aðstæðum hans. Sveinn Skúlason, forstjóri Hrafnistu, segir að þegar hafi verið gripið til ráðstafana til að þetta endurtaki sig ekki. Hann segir að farið hafi verið yfir málið með starfsfólki, ferlar og gæðahandbók væru fyrir hendi og í tilfellum sem þessum væri ekkert annað að gera en að þjálfa starfsfólk og minna það á hvað því beri að gera þegar atvik sem þessi henda. Aðspurður hvort hann eigi von á frekari eftirmálum af þessu máli segir Sveinn að Hrafnista muni ekki gera neinar athugasemdir því að það sem fram komi bráðbirgðaúrskurði Landlæknisembættisins sé satt og rétt. Það sé hins vegar annarra að ákveða um framhaldið en ljóst sé að landlæknir muni ekki aðhafast frekar í málinu. Sveinn segir nauðsynlegt að árétta það í hinni opinberu umræðu að maðurinn hafi verið búsettur á vistheimili en ekki legið á hjúkrunardeild þar sem umönnun sé með öðrum hætti. Málinu er ekki lokið þar sem ættingjar fóru fram á að lögregla rannsakaði málið. Sveinn segir að málið sé úr höndum stjórnenda Hrafnistu en það sé lögreglu að meta hvort öll atvik málsins komi fram í skýrslu Hrafnistu og úrskurði landslæknis eða hvort skoða þurfi málið enn frekar. Hann telji að öll atriði málsins séu komin fram.