Pressuball á morgun

Blaðamenn og makar þeirra hafa verið tíðir gestir í fatahreinsunum bæjarins í vikunni enda áhersla lögð á snyrtilegan klæðnað á Pressuballinu. Menn vilja vitaskuld vera sjálfum sér og miðli sínum til sóma og gamall sósublettur getur auðveldlega spillt fyrir. Meðal blaðamanna er Pressuballið auglýst sem "ball ársins" og segir það sitt um væntingarnar. Þó fátt sé til sparað í veisluhöldunum nú er annar blær yfir Pressuballinu en var á sjöunda áratugnum. Þá voru forsetar og ráðherrar meðal gesta og ræðumenn kvöldsins komu jafnan úr hópi stjórnmálamanna eða skálda. Nú er öldin önnur og blaðamenn sækja ekki vatnið yfir lækinn. Ræðumaður kvöldsins verður Karl Blöndal, aðstoðarritstjóri Morgunblaðsins, sem þykir ræðumaður góður. Matseðillinn er glæsilegur, parmaskinka með gæsalifur og olíuediki verður í forrétt, heilsteikt nautalund með sveppum, kartöflum og sósu verður í aðalrétt og að lokum sporðrenna gestir ísþrennu með volgum jarðaberjum og steiktum ananas. Þó ekki sé gert lítið úr ræðumanni kvöldsins, matseðlinum eða dansleiknum á eftir er afhending blaðamannaverðlaunanna hápunktur kvöldsins. Veitt verða verðlaun í þremur flokkum, fyrir rannsóknarblaðamennsku ársins, bestu umfjöllun ársins og loks blaðamannaverðlaun ársins. Í fyrra hlutu Agnes Bragadóttir, Brynhildur Ólafsdóttir og Reynir Traustason verðlaunin. Að borðhaldi loknu fá gestir sér snúning. Hljómsveitin Vax leikur fyrir dansi en hún hefur gert það gott á dansibölllum að undanförnu. "Dómsmálagiggið gekk vel og Bjössi Bjarna var ánægður," stendur á heimasíðu sveitarinnar.