Hittust í gegnum stefnumótasíðu

Norska blaðið Dagbladet birti nýlega viðtal við norskt-íslenskt par, Súsönnu Andreudóttur, 28 ára, og Christopher Landmark, 32 ára, sem kynntust á stefnumótasíðu. Þau byrjuðu að búa saman þremur dögum eftir að hafa hist í fyrsta skipti og ætla að gifta sig í sumar. "Eiginlega virkaði hún frekar leiðinleg, hún hvorki reykti eða drakk en hún var sæt á myndinni," segir Christopher um fyrstu kynnin af Súsönnu en ekkert kemur fram hvað henni fannst um hann. Súsanna og Christopher kynntust í september 2003. Þau hittust fyrst á kaffihúsi og byrjuðu að búa saman þremur dögum síðar. Þau eiga tvær Schäfer-tíkur, Freyu og Troju sem eru nefndar Christophersdætur að íslenskum sið. Þau ætla að gifta sig í sumar. Súsanna flutti til Noregs árið 1997 og Oslóar fjórum árum síðar. Dagbladet rekur stefnumótasíðu á netinu, Blink, og hefur upp á síðkastið birt viðtöl við fólk sem hefur kynnst í gegnum hana til að auglýsa síðuna enn frekar.