Sameinast í Háskólanum í Reykjavík

Háskólinn í Reykjavík og Tækniháskóli Íslands munu sameinast undir nafninu Háskólinn í Reykjavík og tekur sameinaður skóli til starfa 19. ágúst næstkomandi. Þessi ákvörðun kemur í kjölfar samþykktar Alþingis í gær á samruna háskólanna tveggja með því að fella úr gildi lög um Tækniháskóla Íslands. Nemendum og starfsfólki háskólanna tveggja var tilkynnt um þetta á fundi í Borgarleikhúsinu í dag og eftir því sem segir í tilkynningu frá Háskólanum í Reykjavík var framangreint nafn fyrir valinu þar sem það þótti gott og jafnframt hlutlaust að því leyti að undir því nafni geta flestar námsgreinar rúmast. Þá er Háskólinn í Reykjavík eða Reykjavik University er orðið þekkt nafn erlendis og einnig er algengt að háskólar beri nafn höfuðborga landa. Stúdentafélög háskólanna tveggja, Viska frá HR og Technis frá THÍ, hyggjast einnig sameinast undir nafninu Stúdentafélag Háskólans í Reykjavík. Stúdentafélögin hafa stutt eindregið þennan samruna m.a. með hvatningu til alþingismanna að ganga frá málinu. Búast má við að nemendur Háskólans í Reykjavík verði nálægt 2.500, en sameinaður háskóli tekur til starfa með skólasetningu þann 19. ágúst 2005. Húsnæði skólans verður fyrst í stað áfram á tveimur stöðum, þ.e. við Ofanleiti og Höfðabakka, en unnið er að því að velja sameinuðum háskóla nýjan framtíðarstað og er þá einkum verið að meta Vatnsmýrarsvæðið í Reykjavík annars vegar og Urriðaholt í Garðabæ hins vegar.