Má vera í islömskum búningi

Áfrýjunardómstóll í Bretlandi hefur úrskurðað að skólayfirvöldum í Luton hafi verið óheimilt að banna unglingsstúlku að klæðast íslömskum búningi í skólanum. Dómurinn þykir mikill sigur fyrir múslima sem telja sig víða eiga undir högg að sækja eftir að stríðið gegn hryðjuverkum hófst. Shabina Begum, sextán ára, hefur í tvö ár barist fyrir að mega klæðast svonefndum jilbab-búningi í skólanum en slíkur fatnaður hylur allan líkamann, að höndum og andliti undanskildum. Áttatíu prósent nemenda í Denbigh-skólanum í Luton eru múslimar. Auk hefðbundinna skólabúninga hefur stjórn skólans fram til þessa leyft stúlkum að klæðast shalwar kameez-búningi sem samanstendur af buxum og hnésíðri skyrtu. Árið 2002 ákvað Begum að slíkur fatnaður samræmdist ekki trú sinni og því ákvað hún að taka upp jilbab-búninginn. Skólastjórinn bar því hins vegar við að með því væri gert lítið úr þeim sem notuðu shalwar kameez-klæðin og því væri ekki hægt að leyfa henni þetta. Hún fór í annan skóla þar sem aðrar reglur giltu en höfðaði jafnframt mál gegn sínum gamla skóla. Hæstiréttur úrskurðaði skólanum í vil í fyrra þar sem Begam gat ekki sýnt fram á að brotið hefði verið á rétti hennar til náms en nú hefur áfrýjunardómstóll komist að annarri niðurstöðu. Í viðtali við Guardian sagðist Begam fagna niðurstöðunni mjög. "Dómurinn er sigur fyrir alla múslima sem vilja varðveita sérkenni sín þrátt fyrir fordóma og hræsni samfélagsins." Hún bætti því við að ákvörðun skólans endurspeglaði það andrúmsloft sem ríkir nú á Vesturlöndum eftir að stríðið gegn hryðjuverkum hófst eftir árásirnar 11. september 2001. Í fyrra bönnuðu frönsk yfirvöld öll trúarleg tákn í skólum og vakti bannið mikla reiði múslima. Nú virðast Bretar hafa farið aðra leið því dómurinn hefur þau áhrif að skólar um gervallt Bretland verða að breyta reglum sínum í þessum efnum.