Siglt frá miðborginni

Siglt verður frá gömlu höfninni í miðborginni út í Viðey í sumar, í stað þess að sigla frá Sundahöfn. Þetta kom fram í svari meirihluta borgarstjórnar við fyrirspurn Sjálfstæðismanna á fundi borgarráðs í gær. Siglingarleiðin verður fimmfalt lengri. Hún lengist úr einum kílómetra í fimm. Bæði kemur breytingin til vegna framkvæmda við Sundahöfn og vonar um að nálægð við aðrar siglingar, eins og hvalasiglingar, muni auka umferð út í Viðey. Árið 2007 er áætlað að ný hafnaraðstaða við Skarfagarð í Sundahöfn fyrir siglingar til Viðeyjar verði tekin í notkun. Samningur við Viðeyjarferjuna ehf. rann út um áramót, en var framlengdur til 30. apríl. Stefnt er að því að útboð á samgöngum við Viðey verði auglýst á sunnudag og nýr samningur taki gildi frá og með 1. maí. Þá er einnig stefnt að því að útboð á veitingarekstri í Viðeyjarstofu verði auglýst á sunnudag og taki gildi frá og með 1. júní þegar samningur við Goðatorg ehf rennur út.