Öryggisgæsla í hámarki

Öryggisgæsla í London hefur enn verið hert og er nú í algjöru hámarki þar sem mennirnir sem frömdu hryðjuverkin á fimmtudaginn eru enn á lífi og undirbúa aðra árás. Þessu er haldið fram í breska dagblaðinu Times í morgun. Þar segir að allt tiltækt lið lögreglu og öryggissveita sé nú í viðbúnaðarstöðu auk þess sem hermenn hafi verið kallaðir til aðstoðar. Rannsóknin beinist nú að myndum frá King´s Cross lestarstöðinni þar sem talið er að árásarmennirnir hafi ráðið ráðum sínum fyrir árásirnar. Stór hluti Lundúnabúa mætti í morgun í fyrsta sinn til vinnu eftir hryðjuverkin á fimmtudaginn. Þó að fólk hafi verið hvatt til að mæta til vinnu sinnar á föstudaginn tóku langflestir sér frí og því má segja að fyrst í dag sé borgarlífið endanlega komið í fullan gang á ný eftir hryðjuverkin.