Hvasst eða stormur um vesturland

Gert er ráð fyrir hvassviðri eða stormi á vestanverðu landinu síðdegis og í kvöld. Í morgun bætti í vind á annesjum vestanlands og verður vindurinn af sunnan og suðaustan, 18-23 metra á sekúndu um hádegi með rigningu sem færist síðan yfir landið í nótt. Í Reykjavík verður sunnan og suðaustan 15 til 20 metrar á sekúndu í dag, rigning og þriggja til sex stiga hiti. Skilin færast svo austur yfir landið og í fyrramálið ætti að vera suðvestan 10 til15 metrar á sekúndu og skúrir eða él sunnan og vestanlands en úrkomulítið norðan og austan.