Haförn undir rafrænu eftirliti

Haferninum, sem notið hefur aðhlynningar í Húsdýragarðinum undanfarnar vikur, var sleppt austur í Grafningi í dag. Örninn verður þó undir rafrænu eftirliti fyrst um sinn. Haferninum, sem er assa mikil, var sleppt nálægt þeim stað sem hún fannst eftir að hún fór úr lið á vinstri væng þegar hún flaug á símalínu. Undanfarna fjörutíu daga og einum betur hefur hún haldið til í Húsdýragarðinum meðan hún var að jafna sig. Þar var henni gefið nafnið Erna. Það var Kristinn H. Skarphéðinsson, arnarséræðingur hjá Náttúrufræðistofnun Íslands, sem hafði yfirumsjón með því að sleppa Ernu lausri. Hún var frelsinu fegin því um leið og henni var sleppt úr búrinu var hún rokin af stað og flaug lágflug þar til hún hvarf. En skyldi Erna hafa hænst að mönnum meðan hún var á meðal þeirra? Kristinn segir svo ekki hafa verið, hún hafi verið jafnstygg þegar henni var sleppt og þegar hún kom í garðinn og það sé bara hið besta mál. Þótt Erna sé nú laus úr prísund sinni er hún þó enn undir eftirliti manna því við hana var festur útvarpssendir þannig að ef eitthvað kemur fyrir rétt eftir sleppingu verður einfalt að finna hana aftur. Stofnstærð hafarnar hér á landi er að sumri 35-40 pör en að vetri 120 til 150 fuglar alls. Hafernir geta orðið sjö kíló að þyngd og vænghafið 2,4 metrar. Erna er tæp sjö kíló og um fjögurra ára gömul. Hafernir verða kynþroska fimm til sjö ára gamlir. Þeir eignast einn til þrjá unga en oftast kemst aðeins einn af. Haförninn er einkvænisfugl og sambúð er ætíð traust. Arnarhjón helga sér óðul og halda tryggð við það eins lengi og kostur er. Þau velja sér yfirleitt hreiðurstæði á breiðum syllum, í klettum eða á lágum klettasnösum við sjávarsíðuna. Haförninn verpir aðallega á Vestfjörðum og Vesturlandi í dag. Hins vegar hefur arnarhreiðrum fjölgað undanfarin ár svo ef til vill fer hann að sjást víðar áður en langt um líður. Örninn hefur verið alfriðaður frá árinu 1913 en fyrir þann tíma var reynt að útrýma honum. Hann var talinn skaðræðisfugl sem tæki jafnvel börn til þess að fæða unga sína.