Ágreiningur ekki orsökin

P. Samúelsson ehf., sem rekur Toyota-umboðið hér á landi, hafnar því sem segir í tilkynningu frá nokkrum starfsmönnum að „djúpstæður ágreiningur innan fjölskyldu og meirihlutaeigenda P. Samúelssonar ehf.“ hafi leitt til þess að fyrrum forstjóri hafi þurft að láta af störfum.  Níu stjórnendur í P. Samúelssyni hafa sagt upp störfum sínum vegna óánægju yfir því að eigendur fyrirtækisins ákváðu að láta Emil Grímsson framkvæmdastjóra fara. Úlfar Steindórsson, sem verið hefur stjórnarformaður, verður framkvæmdastjóri í hans stað og Páll Samúelsson verður stjórnarformaður. Emil hefur selt hlut sinn í fyrirtækinu en jafnframt keypt af því fyrirtækið Artic Trucks. Emil mun standa til boða starf fyrir Toyota í Evrópu. Eftir þvi sem fréttastofan kemst næst mun Ísland vera eina landið í Evrópu þar sem Toyota-fyrirtækið selur ekki bíla sína sjálft heldur um umboðsfyrirtæki. Fréttastofunni er ekki kunnugt um hvort einhverjar breytingar eru fyrirhugaðar á því hér á landi. Toyota-umboðið hefur verið eitt umsvifamesta bílaumboðið hér á landi um árabil og var síðasta ár besta rekstrarár þess frá upphafi. Í tilkynningu sem P. Samúelsson sendi frá sér fyrir stundu segir orðrétt: Í kjölfar breytinga á yfirstjórn P. Samúelssonar ehf., sem kynntar voru sl. föstudag lá fyrir að endurskoða og einfalda þyrfti alla yfirstjórn félagsins. Er sú vinna farin af stað. Hjá fyrirtækinu vinna um 150 frábærir starfsmenn. Þeir búa yfir mikilli sérþekkingu, færni og áratuga reynslu og er það þeim að þakka að Toyota hefur verið algengasta bílategundin í umferð hér á landi frá 1988. Stjórnendur P.Samúelssonar reiða sig á allt það góða fólk til frekari sóknar félagsins á næstu mánuðum og árum.Varðandi málefni einstakra starfsmanna sem kosið hafa að fara með sín mál í fjölmiðla vill fyrirtækið ekki tjá sig opinberlega. Það hafnar því hins vegar sem segir í tilkynningu frá nokkrum starfsmönnum að „djúpstæður ágreiningur innan fjölskyldu og meirihlutaeigenda P. Samúelssonar ehf.“ hafi leitt til þess að fyrrum forstjori hafi þurft að láta af störfum. Þetta er ekki rétt. Meirihlutaeigendur fyrirtækisins eru einhuga að baki þeim tímabæru breytingum sem nú eiga sér stað hjá P. Samúelssyni.P. Samúelsson hefur í um 30 ár farið með umboð fyrir Toyota bifreiðar á Íslandi. Allt frá upphafi hefur verið lögð mikil áhersla á góða þjónustu og hefur markmiðið ávallt verið að geta veitt viðskiptavinum víðtæka þjónustu til líftíðar. Svo verður áfram um ókomin ár.