Tveimur feðrum vísað úr landi

Tveimur erlendum feðrum sem kvæntir eru íslenskum konum hefur verið vísað úr landi eftir að breytingar á útlendingalögum tóku gildi síðasta vor. Þetta kom fram á Alþingi í gær í svari Björns Bjarnasonar dómsmálaráðherra við fyrirspurn Katrínar Júlíusdóttur, þingmanns Samfylkingarinnar. Samkvæmt lögunum þarf erlendur ríkisborgari í hjúskap með íslenskum ríkisborgara að vera orðinn 24 ára til að öðlast dvalarleyfi á grundvelli hjúskaparins. "Eitt er að fá dvalarleyfi, annað að vera vísað úr landi. Engum er vísað úr landi nema að baki þeirri ákvörðun sé sjálfstæð rannsókn," sagði Björn. "Annar mannanna á barn utan hjónabands en í hinum hjúskapnum er fyrir að fara stjúpbarni," sagði Björn. Fram kom að báðir hafa kært brottvísunarúrskurð Útlendingastofnunar til dómsmálaráðuneytisins. Katrín sagði þetta miklar tölur og minnti á að í umsögn Mannréttindaskrifstofu Íslands hefði komið fram þegar frumvarpið var lagt fram að Mannréttindadómstóll Evrópu hefði túlkað 12. grein mannréttindasáttmála Evrópu þannig að í réttinum til að stofna til hjúskapar fælist einnig rétturinn til að búa saman. "Á Íslandi höfum við enga ástæðu til að setja svona ströng lög, sérstaklega undir þeim formerkjum að hér eigi að vernda einstaklinga gegn nauðungarhjónaböndum þegar síðan kemur í ljós að þegar þetta hefur átt við er um að ræða tvo karla sem hafa verið giftir íslenskum konum. Þetta hefur frekar átt við um karla en konur og hefur frekar verið beitt um karla en konur en þegar raunveruleg nauðungarhjónabönd eiga sér stað er frekar um konur að ræða en karla," sagði Katrín. "Einnig vil ég ítreka að mér þykir alvarlegt ef svona ströng regla skilur að föður og barn," sagði hún.