Skilorð fyrir misnotkun

Héraðsdómur Reykjaness dæmdi karlmann á sextugsaldri í gær í sex mánaða fangelsi fyrir að beita sonardóttur sína kynferðislegu ofbeldi. Dómurinn er skilorðsbundinn til þriggja ára. Brotin áttu sér stað árin 2003 og 2004, þegar stúlkan var tíu og ellefu ára gömul, og játaði maðurinn brot sín skýlaust. Í dómsuppsögu er vísað til vottorðs geðlæknis sem maðurinn leitaði til í maí í fyrra "vegna mikilla og langvarandi kvíðaeinkenna" sem eru sögð tengjast brotunum. Þá hafi maðurinn sætt meðferð vegna hegðunar sinnar að eigin ósk undanfarið hálft ár og viljað halda henni áfram. Maðurinn mun sjálfur hafa sætt kynferðislegu ofbeldi á unglingsárum, sem þykir hafa haft áhrif á hegðun hans. Hann er sagður hafa stundað meðferð "af alúð og einlægni" og sýnt "mikla hryggð og iðrun vegna brots síns". Í dómsuppsögn er vísað til greinargerðar frá Barnahúsi, þar sem stúlkan undirgekkst meðferð, þar sem segir að þótt brotið hafi sett mark sitt á hana sýni stúlkan "skýr merki um betri líðan bæði heima fyrir og í viðtölum".