Segir frágang farms ófullnægjandi

Allar líkur benda til þess að frágangur á farmi Jökulfells, sem hvolfdi og sökk norðaustur af Færeyjum í fyrrakvöld, hafi verið ófullnægjandi þannig að farmurinn hafi kastast út í aðra síðu skipsins og valdið slysinu. Að mati sérfræðings um flutningaskip sem fréttastofa Bylgjunnar hefur rætt við var Jökulfell með millidekk í lestunum. Við þær aðstæður er erfiðara en ella að koma farmi á borð við iðnaðarstál tryggilega út í síðurnar báðum megin og hlaða svo jafnt á milli þannig að ekkert hreyfist þótt skipið lendi í veltingi. Í öðru lagi bendir sérfræðingurinn á að lestirnar hefi verið frysitlestir, en þá séu síðurnar klæddar með sléttri einangrun og engar festingar séu í þeim til að stífa farminn af. Í þriðja lagi geti skipinu ekki hafa hvolft vegna leka því atburðarásin hafi verið svo hröð að þeir sem björguðust rétt náðu að komast í flotgalla áður en skipinu hvolfdi og engin skipstjórnarmanna hafi gefið sér tíma til að tala í talstöð. Sérfræðingurinn telur því 99 prósenta líkur á að famurinnn hafi kastast út í aðra síðuna þannig að skipið hafi ekki náð að rétta sig aftur heldur farið á hvolf. Þetta er samhljóða þeirri skýringu sem skipverjarnir, sem bjargað var um borð í danska skipið Vædderen, hafa gefið skipherranum þar og Morgunblaðið hefur eftir honum. Þá er komið fram að þetta var fyrsta ferð skipstjórans með þetta skip. Ekkert hefur verið ákveðið um frekari leit að skipverjunum tveimur sem enn er saknað en flugvél frá danska hernum flaug yfir svæðið eftir birtingu í morgun. Leitarskilyrði á svæðinu eru slæm vegna veðurs og verður staðan metin upp á nýtt þegar líður á daginn. Fokker-vél Landhelgisgæslunnar sem leitaði á svæðinu í gær er til taks ef ósk um aðstoð berst.