Ástarsorg getur verið lífshættuleg

Ástarsorg getur verið lífshættuleg að mati erlendra sérfræðinga. Sorg, sem Íslendingar hafa þekkt til svo öldum skiptir. Gefa þarf ástarsorg mun meiri gaum að mati hópi erlendra geðlækna og sálfræðinga sem rita grein í læknatímaritinu The Psychologist. Þar kalla þeir eftir meiri rannsóknum og umræðu um áhrif hennar . Þeir segja að læknar þurfi að taka mun alvarlegar á einkennum ástarsorgar og jafnvel flokka þau einkenni, sem fylgt getur óendurgoldinni ást, sem sjúkdóm. Vonleysið sem ástarsorginni fylgi geti leitt til djúps þunglyndis og í alvarlegustu tilfellunum til sjálfsmorðshugleiðinga. Þá geti vissrar áráttuhegðunar gætt hjá fólki í ástarsorg, eins og sú að vera stöðugt að athuga tölvupóst eða athuga hvort sms-skeyti hafi skilað sér. Líkamleg einkenni eru meðal annars svefnleysi og grátköst. Þetta kemur lesendum Íslendingasagna kannski ekki svo mjög á óvart. Í Laxdælu má til dæmis lesa um ekkjuna Hrefnu sem var mjög harmþrungin eftir að bóndi hennar, Kjartan, var veginn en hann mun hafa borið af öðrum Íslendingum í þá tíð. Lýsingin í Laxdælu af harmi Hrefnu segir kannski allt sem segja þarf um það sem getur gerst í verstu tilfellunum: „Engan tók Hrefna mann eftir Kjartan. Hún lifði litla hríð síðan er hún kom norður og er það sögn manna að hún hafi sprungið af stríði.“ Anna Valdimarsdóttir sálfræðingur þekkir til einkenna ástarsorgar hjá nútíma Íslendingum. Hún vill alls ekki sjúkdómsgreina ástarsorg en segir að hana skuli þó ekki taka léttvægt.