Jökulfell: Leit hafin úr lofti

Leit er nú hafin úr lofti að þeim sex skipverjum af Jökulfelli sem ekki fundust við mikla leit af sjó í alla nótt eftir að skipinu hvolfdi norðaustur af Færeyjum og sökk fyrir miðnætti. Þyrla af danska eftirlitsskipinu Vædderen bjargaði fimm skipverjum sem voru á sundi í sjónum þegar þyrlan kom að og síðan fannst mannlaus gúmmíbjörgunarbátur. Ekkert hefur sést til hinna sex. Fokker-vél Landhelgisgæslunnar tekur þátt í leitinni ásamt þyrlu frá Færeyjum og frá Vædderen auk nokkurra annarra véla. Veður fer nú heldur versnandi á leitarsvæðinu. Jökulfellið var leiguskip Samskipa og er áhöfnin Eistar. Skipið var á leið frá Lettlandi til Reyðarfjarðar og Reykjavíkur með tvö þúsund tonn af stáli innanborðs. Sex metra ölduhæð var á svæðinu þegar slysið varð og vindur 15 metrar á sekúndu, sem að öllu jöfnu hefði ekki átt að ógna öryggi skipsins. Vædderen er væntanlegur til Færeyja um hádegisbil með skipbrotsmennina sem bjargað var í gærkvöldi. Ekkert liggur enn fyrir um tildrög slyssins enda náðist aldrei talstöðvarsamband við skipstjórnarmenn eftir að sjálfvirkur neyðarsendir um borð fór í gang.