Hamas og Jihad neita vopnahléi

Mahmoud Abbas, leiðtogi Frelsissamtaka Palestínu og einn líklegasti eftirmaður Arafats á forsetastóli, bað í gær herskáa Palestínumenn að hætta öllu ofbeldi þar til kosningar fara fram 9. janúar. Abbas fundaði með fulltrúum 13 palestínskra hópa og samtaka í gær og fór fram á vopnahlé. Heimildir AP-fréttastofunnar herma að leiðtogar Hamas og Jihad hefðu þvertekið fyrir að verða við ósk Abbas nema hann yrði við ósk þeirra um að stofna sérstök regnhlífarsamtök. Vilja leiðtogarnir að Hamas og Jihad fái fulltrúa í þessum regnhlífarsamtökum sem tryggi að þau fái eitthvað hlutverk í ákvarðanatöku um málefni Palestínu þar til kosningarnar verða haldnar. Abbas mun hins vegar ekki hafa tekið vel í þessa tillögu enda þýðir hún að hann þarf að láta völd af hendi til Hamas og Jihad. Abbas sagði við leiðtogana að besta leiðin fyrir þá til þess að komast til áhrifa væri í þing- og sveitarstjórnarkosningum. Hann sagði að slíkar kosningar yrðu líklega haldnar í mars eða apríl.