Þjófar rændu minningarbókinni

Þjófar stálu bók sem vegfarendur höfðu ritað samúðarkveðjur í til fjölskyldu Kenneths Bigley. Minningarbókin lá frammi í mosku í Birmingham ásamt mynd af Bigley, sem myrtur var af gíslatökumönnum í Írak, kertum og samúðarkortum. Öllu þessu var stolið. Mohammed Naseem sagði þjófnaðinn til marks um sjúkan hug þess eða þeirra sem stálu bókinni. "Þetta veldur okkur þungri kvöl og fjölskyldu Bigleys án efa líka," sagði hann. Fyrr á árinu var minningarbók um fórnarlamb Madrídarárásanna á Spáni einnig stolið.