Aðgerðir ESB gegn Súdan

Evrópusambandið samþykkti í dag að grípa til aðgerða gegn Súdan, beiti súdönsk stjórnvöld sér ekki fyrir friði í Darfúr-héraði.  Yfir milljón manna hafa flúð heimili sín og fólkið á ekkert. Það hefur engan mat og getur hvergi farið. Margir hafast við í búðum þar sem hjálparstarf er takmarkað. Stephanie Daniels, starfsmaður Rauða krossins, segir að þegar regntímabilið hefjist á svæðinu í kringum Al Fashir fjölgi malaríutilfellum og sjúkdómum í öndunarfærum meðal fullorðinna og barna. Súdönsk stjórnvöld hafa látið ástandið í Darfúr-héraði óskipt og arabískir vígamenn hafa gengið þar frjálsum höndum, rænt nauðgað og drepið. Forsvarsmenn Evrópusambandsins hóta aðgerðum en þeir hittu súdönsk stjórnvöld í dag. Benita Ferrero-Waldner, utanríkisráðherra Austurríkis, segir að það verði að grípa til einhverra aðgerða eða þvingana ef súdönsk stjórnvöld standi sig ekki sem skyldi.