Svifaseint sektaferli

Brunavarnir margra fyrirtækja og stofnana virðast vera í ólestri. Eins og fram kom í Fréttablaðinu í gær hafa 236 fyrirtæki á höfuðborgarsvæðinu ekki lokið þeim eldvarnaúrbótum sem Slökkvilið höfuðborgarsvæðisins telur nauðsynlegar og er Reykjalundur í Mosfellsbæ í þeirra hópi. Eftirlitsmenn vilja fá ríkari heimildir til álagningar sekta þar sem núverandi kerfi er þungt í vöfum og hentar ekki í öllum tilvikum. Þunglamalegt ferli Húseigendur bera sjálfir ábyrgð á eldvörnum í híbýlum sínum en það er síðan í höndum slökkviliða viðkomandi umdæma að hafa eftirlit með að varnirnar séu fullnægjandi. Það sem af er þessu ári hefur 531húseigandi fengið athugasemdir frá Slökkviliði höfuðborgarsvæðisins vegna slakra brunavarna. Málum 295 þeirra er lokið en hinir 236 hafa enn ekki lokið nauðsynlegum úrbótum og mál þeirra því enn til meðferðar. Níu hefur verið hótað dagsektum. Að sögn Hrólfs Jónssonar slökkviliðsstjóra er talsverður aðdragandi að því að dagsektum sé hótað. Byrjað er á að senda húseiganda kröfubréf um úrbætur og nýti hann ekki andmælarétt sinn fær hann þriggja mánaða frest til úrbóta. Ef ekki hefur verið sýnt fram á úrbætur eftir þennan tíma er viðkomandi tjáð að heimildar verði leitað frá viðkomandi sveitarfélagi til að leggja á sektir. Þegar heimildin er fengin, vanalega nokkrum vikum síðar, er húseiganda enn einu sinni tilkynnt um að dagsektir séu yfirvofandi og hafi hann ekki gert bragarbót innan þriggja mánaða hefst innheimta. Sektirnar eru þó ekki innheimtar ef húseigandi vinnur í samræmi við verkáætlun slökkviliðsins. Þar sem um dagsektir er að ræða getur fjárhæðin orðið allhá. Miðað er við að dagleg sekt nemi 0,005 prósentum af brunabótamati fasteignarinnar, að lágmarki 2.000 krónur og að hámarki 500.000 krónur á dag. Engar dagsektir hafa verið innheimtar þetta árið. Að mati slökkviliðsins geta ágallar á brunavörnum verið óverulegir, umtalsverðir og afgerandi. Þar sem eingöngu er hætta á að eigur húseiganda skemmist í eldi gerir slökkviliðið litlar athugasemdir við brunavarnir að öðru leyti en að benda á það sem betur má fara. Sé hins vegar öryggi fólks í hættu vegna ónógra eldvarna er gripið til dagsekta séu ágallarnir umtalsverðir og lokana ef þeir eru afgerandi. Þetta þýðir með öðrum orðum að gripið er til dagsekta þar sem úrbætur eru taldar nauðsynlegar en þó ekki það brýnar að loka verði húsinu. Skyndisektir ákjósanlegar Þrátt fyrir þessi úrræði telja starfsmenn forvarnardeildar slökkviliðsins sig skorta leiðir til að framfylgja kröfum sínum. Bjarni Kjartansson, framkvæmdastjóri deildarinnar, segir að dagsektir og lokanir séu í eðli sínu flóknar og þungar í vöfum og því henti þær ekki í öllum tilvikum. Eftirlitsmenn vildu gjarna hafa heimildir til að beita skyndisektum við ákveðnar aðstæður, líkt og lögreglumenn geta gert. Bjarni tekur dæmi af veitingastað þar sem brunaútgangar hafa verið tepptir með kössum eða þvíumlíku. Í dag er erfitt að knýja fram úrbætur á stundinni. Ef á hinn bóginn væri hægt að hóta sektum á staðnum við næstu skyndiheimsókn væri öruggt mál að húseigandi myndi ekki láta standa sig að slíku broti aftur. Annars segir Bjarni að eldvarnareftirlitsmenn búi við ákveðna þversögn. "Almenningi er í nöp við eftirlit og vill eðlilega hafa sem mest frelsi. Hins vegar ef eitthvað gerist þá spyr fólk auðvitað hvernig þetta geti gerst og hvar hið opinbera eftirlit hafi eiginlega verið. Eftir á að hyggja hefðum við stundum mátt ganga harðar fram í eftirlitinu, en ef ekki kviknar í erum við gagnrýndir fyrir of harða framgöngu." Meðalvegurinn er því vandrataður og ekki alltaf gott að meta hvort eða hvernig eigi að bregðast við. Reykjalundur undir smásjá slökkviliðs Athygli vekur að endurhæfingarstöðin Reykjalundur er á meðal þeirra stofnana sem slökkviliðið hefur haft afskipti af vegna ónógra brunavarna. Raunar er málið komið á það stig að á fundi sínum 29. september tók bæjarstjórn Mosfellsbæjar dagsektabeiðni slökkviliðsins fyrir, en eins og rakið var að ofan þarf talsverðan aðdraganda að slíkri beiðni. Helgi Kristjónsson, fjármálastjóri Reykjalundar, viðurkenndi í samtali við Fréttablaðið að til skamms tíma hefðu brunavarnir hjá stofnunni ekki verið nógu góðar. "Slökkviliðið gerði aðallega athugasemdir við skiptingu hússins í brunahólf svo og vegna neyðarútganga og lýsingu við þá," segir Helgi en ítrekar að mikið vatn hafi runnið til sjávar síðan athugasemdirnar hafi verið gerðar. "Brunaviðvörunarkerfi hefur verið endurnýjað, brunaæfingar haldnar og það sem snýr að neyðarútgöngum fært til betri vegar." Brunahólfunin er komin á dagskrá þótt Helgi segi að erfitt sé að eiga við hana. "Þetta tekur allt sinn tíma, en allt er í réttum farvegi. Við munum standast allar kröfur brunaeftirlitsins þegar þar að kemur. Við ætlum ekki að láta það henda okkur að lenda í dagsektum vegna brunavarna, það bara gerist ekki," segir Helgi á Reykjalundi. Bæjarstjórn Mosfellsbæjar frestaði á sínum tíma að taka afstöðu til beiðni slökkviliðsins þar sem hún vildi gefa Reykjalundi kost á að greiða úr sínum málum. Á meðan bíður slökkviliðið þess sem verða vill en samkvæmt upplýsingum blaðsins telja forsvarsmenn þess að enn vanti nokkuð upp á að eldvarnir Reykjalundar séu eins og best verður á kosið.